Ghislaine Maxwell, ish-e dashura dhe bashkëpunëtorja e burgosur e Jeffrey Epstein, mohoi gjatë intervistave të saj me Departamentin e Drejtësisë të Shteteve të Bashkuara të ketë qenë dëshmitare e ndonjë sjelljeje të papërshtatshme nga ish-Presidenti Donald Trump.
Administrata Trump publikoi qindra faqe me transkripte dhe regjistrime audio nga intervistat që Zëvendës Prokurori i Përgjithshëm, Todd Blanche, zhvilloi me Maxwell gjatë muajit të kaluar. Sipas dokumenteve, Maxwell deklaroi se një “listë klientësh” shumë e diskutuar nuk ekziston dhe e mohoi që të kishte parë Trump të përfshirë në ndonjë formë sjelljeje seksuale. Ajo pohoi: “Në fakt, unë nuk e kam parë kurrë Presidentin në asnjë lloj ambienti masazhi.”
Maxwell kujtoi se kishte dëgjuar për Trumpin dhe ndoshta e kishte takuar për herë të parë në vitin 1990, kur babai i saj, Robert Maxwell, manjati i gazetave, ishte pronar i New York Daily News. Maxwell tha se kishte qenë shpesh në pronën e Trump në Mar-a-Lago, Florida, ndonjëherë vetëm, por nuk e kishte parë Trump që nga mesi i viteve 2000. Ajo u pyet nëse kishte dëgjuar ndonjëherë nga Epstein ose dikush tjetër se Trump “kishte bërë diçka të papërshtatshme me masazhostet” ose me dikë tjetër dhe u përgjigj: “Absolutisht kurrë, në asnjë kontekst.”
Maxwell u intervistua gjatë dy ditëve në korrik në një gjykatë në Florida. Ajo iu dha imunitet i kufizuar, që i lejoi të fliste lirisht pa frikën e ndjekjes penale për çdo deklaratë që jepte, përveç rastit të dhënies së një deklarate të rreme. Aktualisht, Maxwell po vuan një dënim prej 20 vjetësh burgimi për një skemë trafikimi seksual dhe ka bërë një peticion në Gjykatën Supreme të SHBA-së për të rishqyrtuar këtë vendim.
Ndërkohë, Departamenti i Drejtësisë të premten nisi t’i dërgojë Komitetit Mbikëqyrës të Dhomës së Përfaqësuesve të dhënat nga hetimi, të cilat paneli planifikon t’i bëjë publike pasi të heqë informacionet e rezervuara.
Presidenti Trump ka akuzuar kundërshtarët e tij politikë se po e përdorin çështjen për të shpërqendruar vëmendjen nga atë që ai e konsideron si fitore të administratës së tij. Sidoqoftë, ai është përballur gjithashtu me presion nga Partia Republikane për më shumë transparencë lidhur me hetimet rreth Jeffrey Epstein.
