Gjykata e Hong Kongut dënoi të hënën me 20 vite burg manjatin e medias Jimmy Lai, duke mbyllur çështjen më të madhe të sigurisë kombëtare që nga vendosja e ligjit të diskutueshëm nga Pekini në vitin 2020.
Lai, themeluesi i gazetës opozitare tashmë të mbyllur Apple Daily, u shpall fajtor vitin e kaluar për dy akuza për “bashkëpunim me forca të huaja” dhe një akuzë për botim materialesh “subversive”. Vendimi i së hënës i dha atij dënimin më të ashpër të shqiptuar deri më tani sipas ligjit të sigurisë kombëtare.
Tre gjyqtarët thanë se 78-vjeçari meritonte dënim në nivelin më të rëndë sepse ishte “truri drejtues” i një fushate të vazhdueshme për të kërkuar sanksione, bllokada dhe masa armiqësore nga SHBA-ja dhe vende të tjera kundër Hong Kongut dhe Kinës. Sipas prokurorisë, në këtë rrjet përfshiheshin punonjës të Apple Daily, aktivistë dhe shtetas të huaj.
Përveç Lait, tetë persona të tjerë — mes tyre ish-drejtues të gazetës, një aktivist dhe një ndihmës ligjor — u dënuan me 6 deri në 10 vite burg.
Lai, shtetas britanik, i ka mohuar akuzat dhe është shprehur në gjykatë se është “i burgosur politik” i persekutuar nga Pekini.
Sekretarja e Jashtme britanike Yvette Cooper kërkoi lirimin e tij për arsye humanitare, duke thënë se dënimi praktikisht barazohet me burgim të përjetshëm për shkak të moshës së tij. Londra njoftoi se do ta ngrejë sërish çështjen me autoritetet kineze.
Zyra për Çështjet e Hong Kongut dhe Makaos në Këshillin e Shtetit kinez reagoi duke deklaruar se vendimi “dërgon një mesazh të qartë se kushdo që sfidon ligjin e sigurisë kombëtare do të ndëshkohet ashpër”.s
