Demi Moore ka dalë në mbrojtje të Emma Heming Willis, bashkëshortes së Bruce Willis, pas kritikave që ajo mori pas njoftimit se ylli i Die Hard, i cili vuan nga një formë progresive e demencës, është zhvendosur në një shtëpi të ndarë nga pjesa tjetër e familjes.
Në një intervistë të fundit për The Oprah Podcast të Oprah Winfrey, aktorja e nominuar për çmim Oscar për filmin The Substance foli për diagnozën e ish-bashkëshortit të saj dhe se si familja po përballet me situatën. Ajo theksoi se ndjen “një dhembshuri të thellë për” Heming, e cila është bërë kujdestarja kryesore e Bruce-it.
“Kam shumë dhembshuri për Emmën. Ajo është një grua e re,” tha Demi për Oprah-in. “Askush nuk mund ta kishte parashikuar se si do të evoluonte kjo situatë, dhe ajo ka bërë një punë të jashtëzakonshme duke u përkushtuar për të ndjekur rrugën e duhur.”
Moore shtoi gjithashtu se “nuk ka një hartë se si të përballosh një situatë të tillë. Shumë përgjegjësi i kanë rënë mbi Emmën, e cila është dashur të kuptojë vetë se si të menaxhojë gjithçka. Dhe gjëja më e bukur – për të cilën ajo flet edhe në librin e saj të fundit – është ndërgjegjësimi për faktin se sa thelbësore është që, për ata që kujdesen për të tjerët, të mos harrojnë të kujdesen edhe për veten e tyre. Nëse nuk gjen kohë për t’u siguruar që ti vetë je mirë, nuk mund të jesh i pranishëm për askënd tjetër.”
Në mars të vitit 2022, familjarët e Willis njoftuan tërheqjen e tij nga kinematografia pas një diagnoze fillestare për afazi, e cila më pas u përkeqësua progresivisht.
Libri i Emma Heming, me titull The Unexpected Journey: Finding Strength, Hope and Yourself on the Caregiving Path ("Udhëtimi i Papritur: Si të gjesh forcën, shpresën dhe veten në rrugën e kujdestarisë"), do të publikohet më 9 shtator.
