Një avion Boeing 777-200ER i United Airlines kreu një ulje emergjente në aeroportin Washington Dulles, pak minuta pas ngritjes për në Tokio, për shkak të një defekti teknik në motor.
Sipas njoftimit të linjës ajrore, fluturimi UA 803 u detyrua të kthehej menjëherë në aeroportin e nisjes pasi u konstatua humbje e energjisë në një nga motorët. Avioni u ul në mënyrë të sigurt dhe nuk u raportuan të lënduar mes 275 pasagjerëve dhe 15 anëtarëve të ekuipazhit.
“Menjëherë pas ngritjes, fluturimi UA 803 u kthye në Aeroportin Washington Dulles ku avioni u ul në mënyrë të sigurt për t’u përballur me një humbje të energjisë në një nga motorët e tij”, tha linja ajrore.
United Airlines u kërkoi ndjesë pasagjerëve për kthimin e papritur, duke sqaruar se avioni do t’i nënshtrohej kontrolleve dhe riparimeve teknike përpara se të rifillonte fluturimin. Udhëtarët pritet të transportohen drejt destinacionit final, aeroportit Haneda në Tokio, me një avion tjetër.
Sipas një zëdhënësi të Aeroportit Dulles, më i madhi në kryeqytetin amerikan, avioni ishte ngritur rreth orës 12:20 dhe se gjatë incidentit u raportua një zjarr në bimësinë pranë pistës, i cili u shua shpejt nga shërbimet zjarrfikëse. Avioni u kthye dhe u ul në siguri rreth orës 13:30, duke u inspektuar më pas nga autoritetet përkatëse.
Pista e prekur u mbyll për një periudhë të shkurtër, por për shkak të numrit të pistave në dispozicion, nuk pati ndikim në fluturimet e tjera.
Administrata Federale e Aviacionit (FAA) konfirmoi se kthimi i avionit u shkaktua nga një defekt në motor gjatë ngritjes dhe njoftoi se ka nisur një hetim për të përcaktuar shkaqet e e incidentit.
