Revista satirike franceze Charlie Hebdo është paditur nga një çift avokatësh zviceranë për një karikaturë të botuar më 9 janar, që satirizon zjarrin vdekjeprurës në një bar në vendpushimin e skive Crans-Montana, ku humbën jetën 40 persona. Padia u ngrit në kantonin Valais kundër revistës dhe karikaturistit Eric Salk.
Në karikaturë shfaqen dy skiatorë të djegur dhe të fashuar duke zbritur në pistë, me mbishkrimin “Crane Montana”, titullin e supozuar të filmit “The Burned Ski” dhe frazën “Komedia e Vitit”, një referencë satirike ndaj filmit të vitit 1979 “Les Bronzés font du ski”.
Avokatët argumentojnë se karikatura dehumanizon viktimat, duke i kthyer në objekt talljeje një tragjedi reale, sidomos pasi u publikua në ditë zie kombëtare për Zvicrën. Ata theksojnë se respekti për dinjitetin njerëzor duhet të ketë përparësi ndaj lirisë së shprehjes, dhe kërkojnë hetim penal si dhe kompensim financiar që do t’u shpërndahet familjeve të viktimave. Charlie Hebdo nuk ka komentuar mbi padinë.
