Ministrja e Jashtme e Mbretërisë së Bashkuar, Yvette Cooper, tha se i ka bërë të qartë Izraelit që të mos aneksojë pjesë të Bregut Perëndimor si reagim ndaj vendimit britanik për njohjen e shtetit palestinez.
Deklarata erdhi përpara një konference në OKB në Nju Jork të hënën, ku edhe Franca dhe vende të tjera europiane pritet të bëjnë njoftime të ngjashme.
Një ditë më parë, kryeministri Sir Keir Starmer shpalli vendimin historik për njohjen e Palestinës si shtet, bashkë me Kanadanë, Australinë dhe Portugalinë. Kryeministri izraelit Benjamin Netanyahu e dënoi ashpër këtë hap, duke e quajtur “shpërblim të madh për terrorizmin”.
Cooper theksoi se ka paralajmëruar homologun izraelit se një hap i tillë nuk duhet ndërmarrë.
“Kjo është një vendimmarrje për të mbrojtur sigurinë e Izraelit dhe palestinezëve. Është për paqe, drejtësi dhe sigurinë e gjithë Lindjes së Mesme”, tha ajo.
Sipas saj, ekstremistët në të dyja anët po përpiqen të zbehin perspektivën e një zgjidhjeje me dy shtete, ndaj Mbretëria e Bashkuar ka një detyrim moral për ta ringjallur atë.
“Ne njohim shtetin e Izraelit, po kështu duhet të njohim edhe të drejtën e palestinezëve për shtetin e tyre,” u shpreh Cooper.
Ajo shtoi se Konsullata e Përgjithshme britanike në Jerusalemin Lindor do të vazhdojë të funksionojë në këtë fazë, derisa të nisë procesi diplomatik me Autoritetin Palestinez.
Në kuadër të Asamblesë së Përgjithshme të OKB-së, Cooper do të synojë të ndërtojë konsensus ndërkombëtar mbi një kornizë paqeje për Lindjen e Mesme.
