Ish-presidenti francez Nicolas Sarkozy po vuan dënimin e tij në një qeli prej 9 metrash katrorë në të ashtuquajturin krah “VIP” të burgut La Santé në Paris, pas vendimit gjyqësor që e shpalli fajtor për financim të paligjshëm të fushatës zgjedhore të vitit 2007, një çështje e ndërlidhur me regjimin e ish-diktatorit libian Muammar Gaddafi.
Sarkozy, 70 vjeç, është ish-presidenti i parë francez që përfundon në burg që nga koha e Marshall Philippe Pétain, i cili bashkëpunoi me nazistët gjatë Luftës së Dytë Botërore. Dënimi i tij është pesë vjet burg, nga të cilat një pjesë do të vuhet me burgim të mbyllur, ndërsa pjesa tjetër mund të konvertohet në arrest shtëpie apo mbikëqyrje elektronike, në varësi të vendimit të mëvonshëm të autoriteteve gjyqësore.
Mediat franceze kanë publikuar foto nga qelia e Sarkozy-t, që është e pajisur me një shtrat, tavolinë pune, dush të vogël, tualet, një dritare dhe televizor, për të cilin paguan 14 euro në muaj. Ai ka gjithashtu një sobë elektrike, si dhe qasje të kufizuar në palestër dhe bibliotekë.
Në mjedisin e vogël prej 9 metrash katrorë, ish-presidenti ka vendosur dhjetë fotografi personale, për ta bërë hapësirën më të ngrohtë dhe më familjare.
Sipas të përditshmes franceze Le Figaro, Nicolas Sarkozy mori me vete tre libra – numri maksimal i lejuar për të burgosurit në hyrje të institucionit. Midis tyre janë dy vëllimet e “Kontit të Monte Kristos” nga Alexandre Dumas dhe “Biografia e Jezusit” nga Jean-Christian Petitfils. Zgjedhja e këtyre librave nuk është e rastësishme. “Konti i Monte Kristos” rrëfen historinë e Edmond Dantès, një burrë që burgoset padrejtësisht dhe përgatit hakmarrjen e tij – një paralelizëm i qartë me ndjesinë e Sarkozy-t, i cili vazhdon të deklarojë publikisht se është i pafajshëm dhe viktimë e një procesi politik. Nga ana tjetër, “Biografia e Jezusit” paraqet një qasje historike ndaj figurës së Krishtit, larg interpretimeve fetare, dhe për shumëkënd simbolizon balancën mes hakmarrjes dhe faljes, një kontrast i qëllimshëm me librin e Dumas.
Para se të dorëzohej tek autoritetet, Sarkozy u shpreh se “një njeri i pafajshëm po çohet në burg”. Ai ka paraqitur një kërkesë për lirim të parakohshëm, por sipas mediave franceze, gjykatës mund t’i duhen deri në dy muaj për të shqyrtuar aplikimin.
Ndërkohë, ish-presidenti ka bërë të ditur se do të shfrytëzojë këtë periudhë për të shkruar një libër të ri, duke ndjekur traditën e tij të gjatë si autor dhe komentues politik.
Burgu La Santé, i ndërtuar në shekullin XIX, është një nga institucionet më të vjetra dhe më të sigurta në Francë. Ai strehon të burgosur të profilit të lartë, nën kushte të rrepta sigurie. Në të kaluarën, aty kanë vuajtur dënimin figura të njohura ndërkombëtare, përfshirë terroristin e famshëm Carlos “Çakalli”, i cili kryente akte terroriste në vitet 1970.
