NEW DELHI, 19 shkurt – Bill Gates u tërhoq nga pjesëmarrja në Samitin e Ndikimit të Inteligjencës Artificiale në Indi vetëm pak orë përpara fjalimit të tij kryesor të planifikuar për të enjten, duke i dhënë një tjetër goditje një eventi që tashmë ishte shoqëruar me probleme organizative dhe polemika.
Mungesa e themeluesit të Microsoft u pasua edhe nga anulimi i pjesëmarrjes së drejtuesit të Nvidia, Jensen Huang. Samiti ishte prezantuar si forumi i parë madhor i inteligjencës artificiale në “Jugun Global”, ku India synon të pozicionohet si zë udhëheqës në qeverisjen globale të AI.
Fondacioni Gates deklaroi se miliarderi nuk do të mbajë fjalimin “për të siguruar që fokusi të mbetet te prioritetet kyçe të samitit”. Vetëm disa ditë më parë, fondacioni kishte mohuar zërat për mungesën e tij. Tërheqja vjen pas publikimit nga Departamenti Amerikan i Drejtësisë të disa email-eve që përfshinin komunikime mes financierit të ndjerë Jeffrey Epstein dhe stafit të Fondacionit Gates. Gates ka deklaruar më parë se takimet me Epstein kishin lidhje vetëm me çështje filantropike dhe se ishte gabim që e kishte takuar.
Modi: Më shumë vigjilencë për sigurinë e fëmijëve
Kryeministri indian Narendra Modi, në fjalën e tij përkrah Presidentit francez Emmanuel Macron dhe drejtuesve të kompanive si Google, OpenAI dhe Anthropic, theksoi rëndësinë e mbrojtjes së fëmijëve në hapësirën e inteligjencës artificiale.
“Duhet të jemi edhe më vigjilentë për sigurinë e fëmijëve. Ashtu si një program shkollor përpilohet me kujdes, edhe hapësira e AI duhet të udhëhiqet duke pasur në qendër fëmijën dhe familjen,” deklaroi Modi.
Kaos dhe pakënaqësi
Megjithatë, samiti u përball me kritika të ashpra për mungesë organizimi. Sallat e ekspozitës u mbyllën papritur për publikun, duke shkaktuar zemërim te kompanitë pjesëmarrëse që kishin investuar në stenda dhe pavione.
Një tjetër polemikë shpërtheu kur universiteti indian Galgotias u detyrua të largonte stendën e tij pasi një punonjës paraqiti si krijim të vetin një qen robotik të prodhuar komercialisht në Kinë.
Policia mbylli disa rrugë për lëvizjen e VIP-ave, duke shkaktuar bllokime të mëdha trafiku në Delhi, një qytet me mbi 20 milionë banorë. Pamjet në rrjetet sociale treguan pjesëmarrës që ecnin për kilometra të tëra për shkak të mungesës së taksive dhe shërbimeve të transportit.
Samiti që synonte të shfaqte ambiciet globale të Indisë në fushën e inteligjencës artificiale nisi kështu mes anulimesh të bujshme dhe pakënaqësish të shumta.
