Bashkimi Evropian dhe Mbretëria e Bashkuar i kanë kërkuar Izraelit të ndalë rritjen e dhunës nga kolonët hebrenj ndaj palestinezëve në Bregun Perëndimor të pushtuar, e cila është intensifikuar që nga nisja e luftës së Izraelit me Iranin.
Sipas Kombeve të Bashkuara, gjashtë palestinezë janë vrarë gjatë 11 ditëve të fundit në sulme të kryera nga kolonë izraelitë në zona të ndryshme të Bregut Perëndimor.
Qeveria britanike deklaroi se është e tronditur nga vrasjet, ndërsa Bashkimi Evropian theksoi se niveli i dhunës nga kolonët është i papranueshëm. Të dyja palët u bënë thirrje autoriteteve izraelite që të ndërmarrin masa për të garantuar përgjegjësi ligjore dhe për të parandaluar sulme të tjera.
Nga ana tjetër, ushtria izraelite e dënoi dhunën dhe tha se po punon për të identifikuar dhe ndëshkuar autorët e sulmeve.
Izraeli ka ndërtuar rreth 160 vendbanime hebreje në Bregun Perëndimor dhe në Jerusalemin Lindor, që nga pushtimi i këtyre territoreve gjatë luftës së Lindjes së Mesme në vitin 1967. Në këto vendbanime jetojnë rreth 700 mijë izraelitë, ndërsa në të njëjtat zona jetojnë edhe rreth 3.3 milionë palestinezë.
Vendbanimet izraelite në territoret e pushtuara konsiderohen të paligjshme sipas së drejtës ndërkombëtare.
