Shërbimi Botëror i BBC ka rindërtuar historitë e dy vajzave të vogla, Layan al-Majdalawi, 2 vjeç, dhe Mira Tanboura, 6 vjeç, të cilat u vranë në Gaza në incidente të ndara në nëntor 2023, në zona ku po operonte Ushtria Izraelite (IDF).
Në reagim ndaj hetimit, IDF tha se rastet e Layan dhe Mira janë regjistruar dhe “do të shqyrtohen nga autoritetet kompetente”, duke shtuar se “dëmtimi i qëllimshëm i civilëve, veçanërisht fëmijëve, ndalohet rreptësisht”.
BBC thotë se ka dokumentuar mbi 160 raste fëmijësh të qëlluar gjatë luftës në Gaza. Në 95 prej tyre, plagët ishin në kokë ose në kraharor. Në 59 raste, janë mbledhur dëshmi nga dëshmitarë okularë ose organizata për të drejtat e njeriut e personel mjekësor. 57 prej fëmijëve, sipas këtyre dëshmive, u qëlluan nga forcat izraelite, ndërsa dy nga palestinezë – njëri në një të shtënë festive dhe tjetri gjatë një përplasjeje bandash.
Për 36 rastet e mbetura, nuk ka të dhëna të mjaftueshme për shkak të ndalimit të gazetarëve të huaj për të hyrë në mënyrë të pavarur në Gaza dhe për shkak të shkatërrimeve masive.
Komiteti Ndërkombëtar i Kryqit të Kuq i tha BBC-së se bota nuk mund ta pranojë si “normalitet të ri” një lloj lufte ku kaq shumë fëmijë qëllohen me armë zjarri.
