Konflikti mes Iranit dhe Izraelit ka hyrë në ditën e gjashtë, ndërsa përplasjet po përhapen në disa vende të Lindjes së Mesme dhe rajone përreth. Sipas raportimeve ndërkombëtare, gjatë orëve të fundit janë regjistruar sulme dhe tensione që përfshijnë edhe vende të tjera si Katari, Emiratet e Bashkuara Arabe dhe Libani.
Autoritetet në Azerbajxhan deklaruan se territori i tyre është goditur nga dronë iranianë dhe paralajmëruan se do të përgjigjen ndaj çdo sulmi. Nga ana tjetër, Irani e mohoi kategorikisht se ka kryer sulm ndaj Azerbajxhanit.
Teherani ndërkohë pretendon se ka goditur një tanker amerikan, duke e përshkallëzuar më tej përplasjen me Shtetet e Bashkuara.
Në të njëjtën kohë, në Liban janë regjistruar sulme të reja ajrore izraelite, ndërsa tensionet janë shtrirë edhe në zona të tjera të rajonit.
Ndërkohë, në planin politik në SHBA, një mocion për të kufizuar kompetencat e presidentit Donald Trump për të zhvilluar luftë u bllokua, duke i lënë administratës hapësirë më të gjerë për veprime ushtarake.
Edhe në Europë kanë ardhur reagime kritike. Ministri italian i Mbrojtjes, Guido Crosetto, deklaroi se sulmet e përbashkëta të SHBA dhe Izraelit ndaj Iranit shkelin qartë të drejtën ndërkombëtare. Sipas tij, vendimi për të nisur goditjet u mor pa paralajmëruar aleatët dhe partnerët ndërkombëtarë.
