Avokatët që përfaqësojnë viktimat e Jeffrey Epstein i kanë kërkuar dy gjyqtarëve federalë në Nju Jork që të urdhërojnë Departamentin amerikan të Drejtësisë (DOJ) të heqë menjëherë nga interneti miliona dokumente të lidhura me çështjen Epstein, duke argumentuar se publikimi i tyre pa redaktimin e duhur të të dhënave të viktimave ka krijuar një situatë tejet të rëndë.
Në një letër të dërguar të dielën gjyqtarëve Richard Berman dhe Paul Engelmayer — të cilët mbikëqyrin çështjet Epstein dhe Ghislaine Maxwell — avokatët Brittany Henderson dhe Brad Edwards kërkojnë “ndërhyrje të menjëhershme gjyqësore”. Ata theksojnë se shumë prej dokumenteve të publikuara përmbajnë identitetet e viktimave, në shkelje të drejtpërdrejtë të urdhrit të gjykatës.
Henderson tha për CNN se vetëm brenda 48 orëve ajo kishte raportuar mijëra dështime në redaktim në emër të gati 100 të mbijetuarave, jetët e të cilave janë tronditur rëndë nga ky publikim.
Në letër, avokatët shkruajnë se përmasat dhe përsëritja e gabimeve janë aq të mëdha sa nuk mund të justifikohen si thjesht paaftësi burokratike. Sipas tyre, gjykata kishte dhënë një urdhër të qartë dhe të thjeshtë: emrat e viktimave të njohura duhej të redaktoheshin kudo që shfaqeshin para publikimit.
Ata rendisin shembuj konkretë të shkeljeve, mes tyre:
• një viktimë e mitur, emri i së cilës u shfaq i pa redaktuar 20 herë në një dokument të vetëm;
• një email që listonte 32 viktima të mitura, ku vetëm një emër ishte fshehur dhe 31 të tjerët mbetën të dukshëm;
• formularë zyrtarë të FBI-së (“302”) ku shfaqeshin të plota emrat dhe mbiemrat e viktimave.
Pas ankesave, DOJ deklaroi se ka tërhequr nga publikimi dokumentet që u sinjalizuan nga viktimat dhe avokatët e tyre dhe po vijon kontrollet për materiale të tjera problematike. Megjithatë, sipas avokatëve, dëmi tashmë është bërë.
Letra përfshin edhe dëshmi të disa viktimave anonime (“Jane Doe”), të cilat tregojnë se pas publikimit të dosjeve kanë marrë kërcënime me vdekje dhe janë përballur me ngacmime nga media dhe persona të panjohur.
Njëra prej tyre thotë se ekspozimi i të dhënave jo vetëm që e ka traumatizuar sërish, por edhe e ka vënë në rrezik fizik atë dhe fëmijën e saj.
Avokatët theksojnë se DOJ kishte një procedurë të thjeshtë për t’u ndjekur: të kërkonte çdo emër të njohur në sistem dhe ta redaktonte përpara publikimit. Po të ishte bërë kjo, dëmi mund të ishte shmangur.
Henderson paralajmëron se çdo sekondë vonesë po shkakton dëm të ri për këto gra, të cilat janë të frikësuara dhe po kërkojnë mbrojtje reale nga shteti amerikan.
