Një ngjarje e pazakontë dhe e frikshme ka ndodhur në Florida, ku një avion i vogël Beechcraft 55 u rrëzua papritur mbi një makinë në autostradë, duke plagosur shoferen dhe shkaktuar panik mes drejtuesve të tjerë.
Sipas autoriteteve, piloti raportoi probleme me motorin pak para aksidentit, çka e detyroi të tentonte një ulje emergjente rreth orës 17:45 të së hënës. Shoferja e makinës, një 57-vjeçare, u dërgua menjëherë në spital dhe ndodhet jashtë rrezikut për jetën. Piloti 27-vjeçar nga Orlando dhe pasagjeri i tij po aq i ri, nga Temple Terrace, shpëtuan pa lëndime.
Pamjet dhe fotografitë e publikuara tregojnë makinën e dëmtuar rëndë dhe avionin, i cili ka humbur rrotën dhe pjesën e përparme gjatë përplasjes. Dëshmitarët e ngjarjes tregojnë momentin e tmerrshëm: “Pamë thjesht një avion të binte nga qielli. Kaloi shumë pak centimetra mbi makinën time”, tha njëri prej tyre.
Autoriteti Federal i Aviacionit (FAA) ka nisur një hetim të plotë për uljen emergjente, ndërsa edhe Patrulla e Autostradës së Floridës po zhvillon ekspertizën e saj. Incidenti ndodhi vetëm disa orë pas një ngjarjeje të ngjashme në DeLand, ku një avion tjetër i vogël kreu një ulje emergjente në një kryqëzim rrugor, duke plagosur dy persona.
