Një aeroplan i kompanisë ajrore Iberia, tipi Airbus A321XLR, u detyrua të kthehej urgjentisht në aeroportin e Madridit të dielën, pasi u përplas me një zog pak minuta pas ngritjes.
Avioni, që ishte nisur drejt aeroportit Orly në Paris, pësoi dëme në hundën e avionit dhe në motorin e majtë, pasi shpendi fillimisht goditi pjesën e përparme dhe më pas u thith nga motori.
Pilotët ndoqën protokollet e emergjencës, informuan kullën e kontrollit dhe realizuan një ulje të sigurt rreth 20 minuta pas incidentit.
Sipas raportimeve, ky avion ishte një nga më të rinjtë në flotën e Iberias. Video dhe foto të publikuara në rrjetet sociale tregojnë qartë dëmet e shkaktuara nga përplasja.
Ekspertët e aviacionit theksojnë se përplasjet me zogj janë relativisht të zakonshme, veçanërisht gjatë ngritjes dhe uljes, kur avionët lëvizin në lartësi më të ulëta dhe ka më shumë prani të shpendëve.
