Një ngjarje e rëndë ka tronditur opinionin publik në Turqi, pasi Sadettin Saran, president i klubit turk Fenerbahçe dhe biznesmen i njohur, është arrestuar mbrëmjen e së mërkurës në Stamboll, në kuadër të një hetimi në vazhdim për çështje që lidhen me drogën.
Lajmi u konfirmua nga Prokuroria e Qytetit të Stambollit, e cila bëri të ditur se Saran u ndalua nga ekipet e Gardës Provinciale pas paraqitjes së “provave shtesë” në dosjen hetimore. Ai akuzohet për shitje të lëndëve narkotike, lehtësim të përdorimit të drogës dhe përdorim të saj.
Sipas autoriteteve, ekzaminimet e mëparshme forenzike kanë treguar se një mostër flokësh e Saran kishte rezultuar pozitive për substanca narkotike. Megjithatë, më herët ai kishte mohuar publikisht çdo përfshirje, duke deklaruar përmes rrjeteve sociale se nuk kishte përdorur kurrë drogë dhe se nuk ishte përballur asnjëherë nga afër me substanca të tilla.
Saran ishte thirrur për t’u marrë në pyetje ditën e premte, ndërsa në banesën e tij ishte kryer edhe një kontroll nga autoritetet. Gjatë seancës së marrjes në pyetje në Gjykatën e Stambollit, ai qëndroi rreth dy orë, përpara se të dërgohej në Këshillin e Mjekësisë Forenzike për marrjen e mostrave të gjakut dhe flokëve për analiza të mëtejshme.
Pas procedurave mjekoligjore, ai pritet të rikthehet në gjykatë për hapat e mëtejshëm ligjorë. Ndërkohë, hetimi në Stamboll ka çuar tashmë në arrestimin e disa personave të tjerë, mes tyre edhe redaktori Mehmet Akif Ersoy si dhe prezantuesja Ela Rumeysa Cebeci.
Prokurorët po hetojnë nëse Sadettin Saran ka pasur rol aktiv në përdorimin, lehtësimin apo furnizimin me lëndë narkotike. Saran është biznesmen turko-amerikan dhe pronar i grupit “Saran Holding”, i cili operon në sektorët e medias, mbrojtjes dhe aviacionit.
