Palestinezët kanë nisur të kthehen në veri të Gazës, pas deklaratës së Izraelit se armëpushimi ka hyrë në fuqi. Forcat e Mbrojtjes së Izraelit njoftuan se janë tërhequr në linjat e dakorduara, sipas planit të propozuar nga presidenti amerikan Donald Trump, por paralajmëruan se do të vazhdojnë të neutralizojnë çdo kërcënim të menjëhershëm.
Hamasi ka afat deri në orën 12:00 të hënën, sipas orës lokale, për të liruar të gjitha pengjet izraelite, ndërsa Izraeli pritet të lirojë qindra të ndaluar palestinezë.
Ky zhvillim vjen pas miratimit nga qeveria izraelite të fazës së parë të marrëveshjes së Trump për armëpushimin dhe shkëmbimin e pengjeve.
Sipas marrëveshjes, pritet që kamionët me ndihma të hyjnë në Gaza për të mbështetur dy milionë banorët, shumica prej të cilëve janë zhvendosur gjatë konfliktit.
