Egjipti dhe Katari, si ndërmjetësues kryesorë të konfliktit në Gaza, së bashku me gjashtë vende të tjera me shumicë myslimane, kanë ngritur alarmin për planin e Izraelit për të hapur njëkahësisht pikën kufitare Rafah, duke lejuar vetëm daljen e palestinezëve drejt Egjiptit, pa garantuar kthimin e tyre dhe pa lejuar hyrjen e ndihmave humanitare në Gaza.
Paralajmërimi vjen në një kohë kur lufta izraelite në Gaza vijon pa ndërprerje, me rreth 600 shkelje të armëpushimit të regjistruara gjatë shtatë javëve të fundit. Vetëm të shtunën, tre persona u raportuan të vrarë në Beit Lahiya pas sulmeve të reja ajrore izraelite.
Ministrat e Jashtëm të Egjiptit, Indonezisë, Jordanisë, Pakistanit, Katarit, Arabisë Saudite, Turqisë dhe Emirateve të Bashkuara Arabe publikuan të premten një deklaratë të përbashkët, ku shprehën “shqetësim të thellë” për njoftimin e Izraelit se pika kufitare Rafah do të hapet vetëm për daljen e banorëve nga Gaza drejt Egjiptit.
Sipas tyre, ky vendim, i shpallur nga njësia ushtarake izraelite COGAT, përbën shkelje të fazës së parë të planit amerikan për paqe, i cili parashikon funksionimin e Rafahut në të dy drejtimet.
Egjipti dhe vendet nënshkruese e dënuan ashpër këtë plan, duke theksuar “refuzimin e plotë të çdo përpjekjeje për të zhvendosur popullin palestinez nga toka e tyre”, si dhe kërkuan nga Izraeli që të zbatojë plotësisht planin 20-pikësh të presidentit amerikan Donald Trump, që parashikon hapjen e plotë të Rafahut në të dy kahet.
Që nga hyrja në fuqi e armëpushimit më 10 tetor, sipas këtij plani, autoritetet izraelite kanë vonuar vazhdimisht hapjen e pikës kufitare për të lejuar hyrjen e ndihmave jetike dhe largimin e personave që kanë nevojë për trajtim mjekësor.
Si justifikim, Izraeli ka përmendur moskthimin e trupave të të gjitha personave të kapur nga Hamas dhe nevojën për koordinim me Egjiptin. Aktualisht, vetëm një trup i personave të kapur mbetet në Gaza, ndërsa rikuperimi i tij është penguar nga shkatërrimet masive të shkaktuara nga bombardimet izraelite.
