Pentagoni ka vendosur t’i japë fund lidhjeve akademike me Universitetin e Harvardit, duke e akuzuar institucionin më të vjetër universitar në SHBA si një qendër të “aktivizmit anti-amerikan”.
Sekretari amerikan i Mbrojtjes, Pete Hegseth, njoftoi në një video të publikuar në platformën X se Departamenti i Mbrojtjes do të ndërpresë programet e trajnimit ushtarak pasuniversitar, bursat dhe certifikimet që zhvilloheshin në bashkëpunim me Harvardin.
Sipas Hegseth, universiteti nuk përputhet më me prioritetet e Pentagonit për “forcë ushtarake” dhe “parandalim”, duke e quajtur Harvardin një “vatër të radikalizmit globalist”. Ai tha se oficerët amerikanë që janë dërguar atje për studime janë kthyer “të mbushur me ideologji radikale”.
Vendimi vjen në kuadër të përplasjeve të vazhdueshme mes administratës Trump dhe Harvardit. Presidenti Donald Trump ka paralajmëruar edhe padi, duke kërkuar 1 miliard dollarë dëmshpërblim nga universiteti, të cilin e akuzon për përhapje të dezinformimit dhe qëndrime anti-amerikane.
Pentagoni gjithashtu pretendon se disa programe kërkimore të Harvardit kanë bashkëpunuar me institucione të lidhura me Partinë Komuniste Kineze. Sipas raportimeve, mes viteve 2010–2025, Harvardi ka marrë rreth 560 milionë dollarë nga burime kineze.
Akuzat përfshijnë edhe menaxhimin e protestave pro-palestineze në kampus, ku administrata Trump pretendon se janë toleruar sulme ndaj studentëve hebrenj.
Vendimi do të hyjë në fuqi në vjeshtë, ndërsa personelit ushtarak që aktualisht studion në Harvard do t’i lejohet të përfundojë programet. Harvardi ende nuk ka reaguar zyrtarisht.
