Agjentë federalë të emigracionit qëlluan për vdekje një qytetar amerikan në Minneapolis, duke nxitur protesta të ashpra dhe reagime të forta nga autoritetet lokale. Ky është rasti i dytë i ngjashëm brenda këtij muaji në SHBA.
Departamenti i Sigurisë Kombëtare deklaroi se agjentët vepruan në vetëmbrojtje, duke pretenduar se burri i qëlluar iu afrua me armë dhe rezistoi me dhunë ndaj përpjekjeve për ta çarmatosur.
Por video të publikuara nga dëshmitarë, të verifikuara nga Reuters, duket se hedhin poshtë versionin zyrtar. Në pamje, viktima — Alex Pretti, 37 vjeç, infermier i kujdesit intensiv — shihet duke mbajtur një telefon, jo një armë, ndërsa përpiqet të ndihmojë protestues të tjerë që po shtyheshin nga agjentët.
Në video, Pretti shihet teksa përpiqet të ndërhyjë për të mbrojtur disa gra nga përdorimi i forcës. Ai spërkatet me spray lotsjellës, më pas përplaset në tokë nga agjentët. Në momente pasuese, dëgjohen të shtëna, dhe Pretti qëllohet disa herë.
Pas incidentit, qindra protestues u mblodhën në zonë për të kundërshtuar operacionet federale të emigracionit. Protesta u shtrinë edhe në New York, Washington D.C. dhe San Francisco.
Kryebashkiaku dhe guvernatori i shtetit kërkuan ndalimin e operacioneve të emigracionit në qytet, ndërsa presidenti Donald Trump akuzoi udhëheqësit lokalë se po “nxisin rebelim”.
