Agjentë federalë qëlluan për vdekje një burrë në Minneapolis të shtunën, në incidentin e dytë fatal këtë muaj që përfshin forca federale gjatë shtimit të operacioneve për zbatimin e ligjit të emigracionit në këtë qytet të veriut të SHBA-së.
Departamenti Amerikan i Sigurisë Kombëtare deklaroi se agjentë të Patrullës Kufitare hapën zjarr në vetëmbrojtje ndaj një burri që iu afrua me një armë zjarri dhe dy karikatorë.
Shefi i Policisë së Minneapolis, Brian O’Hara, tha se viktima ishte një banor 37-vjeçar i qytetit dhe besohet të ketë qenë shtetas amerikan. Ai nuk publikoi emrin e tij, duke shtuar se burri ishte pronar i ligjshëm i armës dhe nuk kishte precedent penal.
Video që po qarkullon në rrjetet sociale dhe është transmetuar nga mediat televizive tregon persona me maska dhe jelekë taktikë duke u përleshur me burrin në një rrugë të mbuluar me borë, përpara se të dëgjohen të shtënat. Në pamje të tjera, agjentët e emigracionit shihen duke përdorur gaz lotsjellës për të shpërndarë një turmë gjithnjë e më të madhe kalimtarësh.
Thirrje për ndalimin e operacioneve federale
Kryebashkiaku i Minneapolis, Jacob Frey, kërkoi ndërprerjen e menjëhershme të operacioneve të administratës Trump për emigracionin në shtet.
“Sa banorë të tjerë, sa amerikanë të tjerë duhet të vdesin ose të lëndohen rëndë që ky operacion të ndalet?” tha ai gjatë një konference për shtyp.
Edhe guvernatori i shtetit dhe dy senatorë amerikanë i bënë thirrje agjentëve federalë të largohen nga zona. Sipas Reuters, Trump është informuar për incidentin.
O’Hara e cilësoi situatën në vendngjarje si “shumë të paqëndrueshme” dhe u bëri thirrje qytetarëve të shmangin zonën. “Ju lutem, mos e shkatërroni qytetin tonë,” tha ai.
Instituti i Artit në Minneapolis njoftoi se mbylli aktivitetin për ditën për arsye sigurie.
Ngjarja vjen një ditë pasi mbi 10 mijë persona dolën në rrugë për të protestuar kundër pranisë së rreth 3,000 agjentëve federalë të dërguar në shtet me urdhër të Trump. Banorët janë zemëruar nga një sërë incidentesh të fundit, përfshirë vrasjen e shtetases amerikane Renee Good, ndalimin e një qytetari amerikan të marrë nga shtëpia e tij dhe ndalimin e fëmijëve të shkollës, përfshirë një djalë 5-vjeçar.
