Një agjent amerikan i emigracionit ka qëlluar për vdekje një drejtues mjeti në Minneapolis, në mes të një vale të shtuar operacionesh kundër emigrantëve, njoftuan autoritetet lokale dhe federale. Ngjarja është incidenti i fundit i dhunshëm në kuadër të goditjes mbarëkombëtare ndaj emigrantëve gjatë presidencës së Donald Trump.
Pas të shtënave, protesta shpërthyen pranë vendit të ngjarjes, ku disa protestues u përballën me agjentë federalë të armatosur rëndë dhe me maska gazi, të cilët përdorën municione kimike për t’i shpërndarë.
Sipas Departamentit të Sigurisë Kombëtare, agjenti i ICE hapi zjarr pasi, sipas versionit zyrtar, një “protestues i dhunshëm” tentoi të përplaste automjetin mbi oficerët e emigracionit. “Personi i dyshuar u godit dhe ka ndërruar jetë”, deklaroi zëdhënësja Tricia McLaughlin, duke shtuar se oficerët e plagosur pritet të shërohen plotësisht. Detajet e sakta të incidentit ende nuk janë konfirmuar në mënyrë të pavarur.
Kryebashkiaku i Minneapolis, Jacob Frey, fajësoi drejtpërdrejt administratën Trump për përshkallëzimin e tensioneve. “Prania e agjentëve federalë të emigracionit po shkakton kaos në qytetin tonë. Ne kërkojmë që ICE të largohet menjëherë. Qëndrojmë fort në krah të komuniteteve tona emigrante dhe refugjate”, shkroi Frey.
Administrata Trump ka dërguar agjentë federalë të emigracionit në disa qytete të drejtuara nga demokratët gjatë vitit të parë të mandatit, duke shkaktuar reagime të forta. Në javët e fundit, operacionet në Minneapolis janë intensifikuar pas akuzave për mashtrim ndaj emigrantëve somalezë, të cilët Trump i ka cilësuar me gjuhë fyese.
Në vendngjarje u pa një automjet tip SUV i errët, me një vrimë plumbi në xhamin e përparmë dhe gjak në sedilje, i përplasur me një shtyllë në një rrugë të mbuluar nga bora. Banorë të zonës raportuan skena paniku dhe zemërimi, ndërsa ngjarja ka rritur më tej tensionet rreth politikave të emigracionit në SHBA.
