Afrika po përballet me epideminë më të rëndë të kolerës në një çerek shekulli, teksa sëmundja vazhdon të përhapet me shpejtësi në disa vende të kontinentit, përfshirë Burundin dhe Angolën. Paralajmërimi u bë të enjten nga Qendra Afrikane për Kontrollin dhe Parandalimin e Sëmundjeve (Africa CDC), e cila ngriti alarmin mbi përkeqësimin e situatës epidemiologjike.
Sipas të dhënave të publikuara nga Africa CDC, më shumë se 300 mijë raste me kolerë janë regjistruar deri tani gjatë vitit 2025. Krahasuar me rreth 254 mijë raste të raportuara vitin e kaluar, shifrat e sivjetshme tregojnë rritje të ndjeshme dhe shqetësuese të transmetimit. Deri më tani, mbi 7 mijë persona kanë humbur jetën si pasojë e infeksionit, duke e bërë këtë shpërthim ndër më vdekjeprurësit e dekadës.
Drejtori i përgjithshëm i Africa CDC, Jean Kaseya, tha se kolera mbetet një ndër kërcënimet më serioze shëndetësore në kontinent. “Duke analizuar trendin nga viti 2022 e deri më sot, vërehet qartë se çdo vit po regjistrohen më shumë raste. Kolera vazhdon të jetë një problem i madh dhe i vazhdueshëm për Afrikën”, u shpreh Kaseya.
Ai theksoi se është urgjente vënia në zbatim e plotë e planit rajonal të reagimit ndaj kolerës, i cili u lançua në Lusaka të Zambias në gusht të këtij viti. Plani, i cili mbulon periudhën shtator 2025 – shkurt 2026, synon forcimin e mbikëqyrjes epidemiologjike, përmirësimin e menaxhimit të rasteve, rritjen e angazhimit të komunitetit, sigurimin e logjistikës së nevojshme dhe përshpejtimin e fushatave të vaksinimit.
Rritja aktuale e rasteve përfaqëson një shtim prej mbi 30 për qind krahasuar me vitin e kaluar. Sipas Africa CDC, Angola dhe Burundi kanë regjistruar rritje të ndjeshme të infeksioneve gjatë javëve të fundit, gjë që lidhet ngushtë me infrastrukturën e dobët të furnizimit me ujë të pijshëm dhe kanalizimeve.
“Pa akses në ujë të pastër, është pothuajse e pamundur të parandalosh përhapjen e kolerës,” tha Kaseya, duke shtuar se institucioni që ai drejton po bashkëpunon ngushtë me qeveritë e vendeve afrikane për të adresuar këtë problem thelbësor.
Ndër zonat më të goditura mbetet Republika Demokratike e Kongos, ku situata vijon të jetë e rënduar për shkak të konflikteve të brendshme dhe zhvendosjes masive të popullsisë. Megjithatë, autoritetet kanë vënë re një rënie të lehtë të rasteve gjatë kësaj jave.
