Administrata e presidentit amerikan Donald Trump ka paditur të premten Harvard University, duke e akuzuar universitetin se ka shkelur të drejtat civile të studentëve hebrenj dhe izraelitë.
Padia është dorëzuar në një gjykatë federale në Boston dhe përbën përshkallëzimin më të fundit të përplasjes mes Shtëpisë së Bardhë dhe një prej universiteteve më prestigjioze në SHBA. Administrata ka hetuar Harvardin për muaj të tërë dhe ka tentuar të arrijë një marrëveshje me universitetin, por pa sukses.
Në dokumentet e paraqitura në gjykatë, qeveria amerikane pretendon se Harvard “ka mbyllur sytë ndaj antisemitizmit dhe diskriminimit ndaj hebrenjve dhe izraelitëve”, veçanërisht gjatë protestave në kampus pas luftës në Gaza në vitin 2023.
Sipas padisë, ndërsa universiteti zbaton rregulla të rrepta kundër formave të tjera të diskriminimit, protestuesit anti-Izrael në kampus kanë shkelur rregullat “pa u ndëshkuar”. Në dokument thuhet madje se gjatë protestave disa profesorë u kanë çuar ushqim studentëve protestues.
Administrata pretendon gjithashtu se studentët hebrenj dhe izraelitë janë përballur me ngacmime serioze, përfshirë sulme fizike, ndjekje dhe përjashtim nga hapësira universitare si bibliotekat apo klasat.
Padia kërkon që gjykata të shpallë se Harvard ka shkelur detyrimet e tij sipas ligjit federal për të drejtat civile dhe që qeveria të mos jetë më e detyruar të financojë universitetin me grantet ekzistuese. Po ashtu kërkohet që universiteti të kthejë miliarda dollarë fonde kërkimore të marra nga qeveria dhe të vendoset një monitor i pavarur për të mbikëqyrur respektimin e ligjit.
Sekretari amerikan i Shëndetësisë, Robert F. Kennedy Jr., deklaroi se universitetet kanë detyrim të mbrojnë të drejtat civile kur marrin fonde nga qeveria federale.
Padia kundër Harvard vjen pas një përplasjeje që zgjat prej më shumë se një viti mes administratës dhe universiteteve amerikane për mënyrën se si janë trajtuar protestat pro-Palestinë në kampuset universitare. Së fundmi, Departamenti i Drejtësisë ka paditur edhe University of California, Los Angeles për akuza të ngjashme lidhur me antisemitizmin në kampus.
