Një përplasje e re diplomatike është ndezur pas deklaratave të presidentit francez Emmanuel Macron, i cili njoftoi se 26 vende perëndimore janë angazhuar formalisht për të dërguar trupa në Ukrainë — nga ajri, toka dhe deti — menjëherë pas arritjes së një marrëveshjeje armëpushimi mes Kievit dhe Moskës.
Reagimi nga Kremlini ishte i menjëhershëm dhe i ashpër. Presidenti rus Vladimir Putin paralajmëroi se çdo prani e trupave të huaja në territorin ukrainas, edhe pas një marrëveshjeje paqeje, do të shihej si një kërcënim i drejtpërdrejtë për sigurinë e Rusisë.
“Nëse ndonjë forcë e huaj do të shfaqet në Ukrainë, veçanërisht gjatë operacioneve ushtarake, ne do t’i konsiderojmë ato objektiva të ligjshme për shkatërrim,” – tha Putin në një deklaratë zyrtare. Ai theksoi se prania e trupave të NATO-s ishte një nga faktorët që çuan në përshkallëzimin e konfliktit.
Putin shtoi se nëse do të arrihej një marrëveshje paqeje, Rusia do ta zbatonte plotësisht, duke sugjeruar se në një situatë të tillë prania ushtarake perëndimore do të ishte e panevojshme.
Ndërkohë, zëdhënësi i Kremlinit e quajti planin një “kërcënim të drejtpërdrejtë” për Rusinë dhe një provokim serioz në një moment kur diplomacia ka shansin të marrë frymë.
Macron: "Mbështetja amerikane do të finalizohet së shpejti"
Në fund të samitit të 35 vendeve të “Koalicionit të të Vullnetshmëve” në Paris, presidenti Macron konfirmoi se do të ketë një angazhim të gjerë ndërkombëtar për sigurinë e Ukrainës në fazën pas luftës. Ai bëri të ditur se mbështetja amerikane është në proces finalizimi, duke shtuar se ka pasur një telefonatë me presidentin amerikan Donald Trump.
“Shtetet e Bashkuara janë të përfshira në çdo hap të këtij procesi. 26 vende janë zotuar të dërgojnë trupa në Ukrainë për të ofruar garanci sigurie, menjëherë pas arritjes së armëpushimit apo një marrëveshjeje paqeje,” – deklaroi Macron.
SHBA drejt angazhimit ajror, BE-s i kërkohet të ndalojë importet ruse
Presidenti Trump ka sinjalizuar se pjesëmarrja amerikane ka të ngjarë të vijë në formën e asistencës ajrore, ndërkohë që presidenti ukrainas Volodymyr Zelensky ka theksuar nevojën për mbrojtje të shtuar të hapësirës ajrore të vendit të tij.
Gjatë bisedimeve me vendet e koalicionit, Trump ka kërkuar gjithashtu që Bashkimi Evropian të bashkëpunojë me SHBA për të ndalur importet e naftës dhe gazit nga Rusia, si pjesë e presionit ekonomik ndaj Moskës.
