Një ngjarje tragjike ndodhi të dielën në Kopshtin Zoologjik Arruda Câmara në Brazil, ku një 19-vjeçar u sulmua nga luanët, duke humbur jetën. Viktima, identifikuar si Gerson de Mello Machado, vuante nga probleme psikologjike, sipas autoriteteve lokale.
Sipas raportimeve, i riu fillimisht u ngjit në një mur 6 metra të lartë, kaloi telin me gjemba dhe më pas përdori një pemë për të zbritur në kafazin e luanit. Një video e regjistruar nga vizitorët tregon momentin e sulmit.
Pas aksidentit, kopshti zoologjik është mbyllur deri në njoftim të mëtejshëm, ndërsa autoritetet kanë nisur një hetim për të përcaktuar rrethanat e tragjedisë. Zyrtarët theksuan se objekti po zbatonte të gjitha masat e sigurisë, por ngjarja ka ngjallur shqetësim për procedurat mbrojtëse të vizitorëve.
