Një mësuese 57-vjeçare është plagosur rëndë me thikë nga një nxënës 13-vjeçar në një shkollë në Trescore Balneario, në provincën e Bergamos në Itali.
Ngjarja ndodhi mëngjesin e sotëm, pak para orës 08:00, në institutin “Leonardo Da Vinci”, përpara nisjes së mësimit. Mësuesja e frëngjishtes, Chiara Mocchi, u sulmua në korridorin e shkollës nga nxënësi i klasës së tretë të mesme të ulët.
Sipas mediave italiane, adoleshenti ishte veshur me pantallona kamuflazhi dhe një bluzë të bardhë ku me të kuqe ishte shkruar fjala “Vendetta” (Hakmarrje). Ai e goditi mësuesen disa herë me thikë në qafë dhe në bark, duke e plagosur rëndë.
Tre nxënës të tjerë që ndodheshin aty pranë kanë qenë dëshmitarë të sulmit dhe janë marrë në ndihmë nga psikologët.
Mësuesja u transportua me helikopter drejt spitalit Papa Giovanni XXIII në Bergamo, ku iu nënshtrua një operacioni që zgjati mbi dy orë. Autoritetet konfirmuan se ajo ndodhet në reanimacion, por nuk është në rrezik për jetën.
Adoleshenti u neutralizua menjëherë nga një mësues dhe dy punonjës të shkollës, të cilët e mbajtën të bllokuar deri në mbërritjen e karabinierëve. Mësohet se përveç thikës, ai kishte me vete edhe një pistoletë imituese.
Policia po heton për të zbardhur motivet e sulmit, ndërsa vendimi për masat ndaj të miturit pritet nga prokuroria për të mitur.
Ministri italian i Arsimit, Giuseppe Valditara, e cilësoi ngjarjen “shumë të rëndë” dhe deklaroi se është e nevojshme miratimi i rregullave më të ashpra për të luftuar kriminalitetin tek të rinjtë dhe përhapjen e armëve të improvizuara mes tyre.
