Një grua 50-vjeçare shqiptare ka përfunduar në spital pasi u sulmua barbarisht me thikë nga ish-bashkëshorti i saj në mes të rrugës, në ishullin grek të Thasos. Ngjarja e rëndë ndodhi sapo gruaja doli nga një supermarket, moment kur 55-vjeçari e goditi me thikë në fytyrë dhe kokë, duke e lënë të plagosur rëndë.
Pamjet e pasojës së sulmit janë tronditëse, teksa gruaja rrëzohet përtokë dhe qytetarët e paktë që ndodheshin në zonë nxitojnë të ndërhyjnë për ta ndihmuar.
Sipas një dëshmitareje, autori kishte udhëtuar nga Shqipëria drejt ishullit dhe ishte prezantuar para banorëve si vëllai i viktimës, duke mësuar kështu vendndodhjen e saj. “Pasi i shkoi në shtëpi, gruaja e trembur mbylli dyert, por ai i theu xhamin e dritares”, tregon dëshmitarja.
55-vjeçari u arrestua nga policia greke, ndërsa iu sekuestruan një thikë dhe një kaçavidë. Viktima ndodhet në spital nën kujdes mjekësor. Autoritetet po hetojnë motivet dhe rrethanat e ngjarjes.
