Një aksident i rëndë rrugor është regjistruar paraditen e sotme në aksin Kardhiq–Delvinë, në vendin e quajtur Fushë Vërri, në Delvinë.
Sipas informacioneve paraprake, dy automjete janë përplasur me njëri-tjetrin. Njëri prej mjeteve, me targa AA 246 RC, ka dalë nga rruga dhe është përmbysur, ndërsa automjeti tjetër, një Audi me targa AB 558 XR, ka pësuar dëmtime të shumta.
Si pasojë e përplasjes, një person ka humbur jetën, ndërsa tre të tjerë kanë mbetur të plagosur dhe janë transportuar për ndihmë mjekësore.
Në vendngjarje kanë mbërritur menjëherë shërbimet e Policisë, ambulancat dhe forcat zjarrfikëse, të cilat kanë ndërhyrë për nxjerrjen e personave të përfshirë në aksident dhe menaxhimin e situatës.
Grupi hetimor ka nisur punën për zbardhjen e plotë të rrethanave dhe shkaqeve të aksidentit.
