José Mourinho nuk është më trajneri i Fenerbahçes. Klubi turk ka konfirmuar sot largimin e teknikut portugez, pas një bashkëpunimi që nisi në fillim të sezonit 2024–2025.
Në njoftimin zyrtar të klubit thuhet:
"Jemi ndarë me José Mourinhon, trajnerin e skuadrës sonë të parë të futbollit. E falënderojmë për përkushtimin e treguar ndaj ekipit tonë dhe i urojmë suksese në karrierën e tij të ardhshme."
Largimi i Mourinhos vjen pas eliminimit të dhimbshëm të Fenerbahçes nga play-off-i i Ligës së Kampionëve kundër Benficës, një disfatë që rezultoi fatale për të ardhmen e tij në stolin e klubit nga Stambolli.
Mourinho, i cili mori drejtimin e Fenerbahçes me synimin për ta rikthyer klubin në elitën evropiane, nuk arriti të përmbushë pritshmëritë, pavarësisht entuziazmit që shoqëroi emërimin e tij.
E ardhmja e trajnerit të njohur mbetet e paqartë, por mediat evropiane tashmë flasin për interesim nga disa klube të mëdha që mund ta rikthejnë në skenën e futbollit elitar.
