Ditët e fundit, në median sportive shqiptare është ndezur debati për volejbollisten braziliane të Dinamos, Nayara Ferreira, ndaj së cilës janë ngritur dyshime për gjininë, çka ka sjellë edhe pezullimin e saj nga aktivitetet sportive. Federata i ka kërkuar sportistes kryerjen e testit të gjinisë, ndërkohë që çështja ka marrë jehonë të gjerë në rrjetet sociale.
Në një mesazh dërguar emisionit “Shqipëria Live” në Top Channel, Nayara Ferreira ka reaguar publikisht, duke e quajtur situatën “të tmerrshme dhe të padrejtë”:
“Ka qenë e vështirë, por njerëzit do të pendohen që kanë bërë këtë padrejtësi. Unë jam thjesht një vajzë që ka të drejtën të ekzistojë, të vishem dhe të veproj si ndjehem mirë dhe e vërtetë. Nuk jam një grua e rreme, jam një grua e fortë, me shumë luftë pas vetes.”
Sportistja shton se nuk do të dorëzohet përballë paragjykimeve:
“Gjithmonë kam luftuar për të arritur qëllimet e mia dhe nuk do ta pranoj që këta njerëz të më rrëzojnë e përbaltin pa arsye. Unë jam Nayara dhe jam e lirë të jem ajo që dua, si çdo grua tjetër në këtë botë.”
Çështja e Ferreiras pritet të trajtohet nga institucionet sportive përkatëse, ndërsa në opinion publik ka hapur një debat të gjerë mbi të drejtat dhe respektimin e identitetit gjinor në sport.
