Pas një sezoni spektakolar që përfundoi me triumfin historik të Paris Saint-Germain, UEFA Champions League nis sërish këtë të martë në mbrëmje, duke sjellë pritshmëri për surpriza të mëdha. Liverpool konsiderohet skuadra favorite për trofeun sipas bastoreve, falë investimeve të mëdha në merkato dhe synimit të qartë të trajnerit Arne Slot për të fituar trofeun prestigjioz.
Pas “The Reds”, vijnë Arsenal dhe kampionët në fuqi të PSG. “Topçinjtë” janë forcuar dukshëm këtë sezon, veçanërisht me afrimin e sulmuesit të talentuar suedez Viktor Gyokeresh. Arsenal do të ketë një sfidë të vështirë në ndeshjen e parë, duke udhëtuar drejt Spanjës për t’u përballur me Athletic Bilbao.
Ndeshja më interesante e mbrëmjes pritet të jetë ajo mes Juventus dhe Borussia Dortmund. Torinezët vijnë pas një fitoreje të rëndësishme ndaj Interit në kampionat, ndërsa Dortmund ka fituar dy ndeshje radhazi në Bundesligë.
Një tjetër përballje e fortë do të zhvillohet në Allianz Arena të Mynihut, ku Bayern do të presë Chelsea-n. Kjo është një rikthim në një ndeshje të veçantë, pasi të dyja skuadrat ishin përballur në finalen e vitit 2012, ku Chelsea fitoi trofeun për herë të parë në historinë e saj. Të dyja ekipet vijnë këtë sezon me ambicie të mëdha për të shkuar deri në fund.
Në Bernabeu, Real Madrid do të presë Marsejën në një përballje që do të jetë debutimi evropian i trajnerit Xabi Alonso në krye të skuadrës spanjolle.
