Një incident i rëndë me tone nacionaliste dhe gjuhë të hapur urrejtjeje ndaj shqiptarëve ka ndodhur gjatë ndeshjes së parakualifikimeve për Kampionatin Botëror të basketbollit, mes përfaqësueseve të Maqedonisë së Veriut dhe Rumanisë, e zhvilluar në qytetin Kumanovë.
Ngjarja ka marrë përmasa skandaloze për shkak të pranisë së drejtuesve më të lartë të shtetit, përfshirë kryeministrin Hristijan Mickoski, kryetarin e Kumanovës Maksim Dimitrievski, ministrin e Jashtëm Panço Toshkovski dhe zëvendëskryeministrin Ivan Stoilkoviç, të cilët nuk reaguan ndaj thirrjeve të turpshme të publikut. Gjatë ndeshjes, një pjesë e tifozëve në tribunë lëshuan kore të hapura anti-shqiptare, që u dëgjuan qartë në ambientet sportive dhe u raportuan gjerësisht nga mediat lokale.
“Le ta kuptojnë shqiptarët e mallkuar, emri maqedonas nuk do të zhduket. Maqedoni e pastër, e pastër, e pastër”, ishte një nga refrenët që u brohorit në kor, në prani të autoriteteve shtetërore. Skandali nuk përfundoi aty. Më tej, u dëgjuan edhe thirrje skajshmërisht të rënda dhe të dënueshme si:“Shqiptari i mirë është shqiptari i vdekur” dhe “Dhoma e gazit për shqiptarët”, duke rikthyer në kujtesë retorikën më të errët të urrejtjes dhe fashizmit në historinë e Evropës.
Incidenti ka shkaktuar reagime të forta në rrjetet sociale, ku shumë qytetarë dhe figura publike shqiptare kanë dënuar ashpër ngjarjen, ndërsa pritet që komuniteti shqiptar në Maqedoni, por edhe faktorë ndërkombëtarë dhe organizata për të drejtat e njeriut, të kërkojnë sqarime të menjëhershme dhe masa konkrete ndaj tolerimit të gjuhës së urrejtjes në një aktivitet zyrtar sportiv.
