FIFA ka zbuluar zyrtarisht ndarjen e vazove për shortin e Kupës së Botës 2026, i cili do të hidhet më 5 dhjetor në Uashington D.C. Në vazon e parë ndodhen tre vendet pritëse – SHBA, Meksika dhe Kanadaja – së bashku me ekipet më të renditura të botës si Spanja, Argjentina, Franca, Anglia, Portugalia, Brazili, Holanda, Belgjika dhe Gjermania.
Skuadrat që do të vijnë nga “play-off”-et, përfshirë Shqipërinë dhe Kosovën, do të jenë të gjitha në vazon e katërt, duke u konsideruar formalisht si ekipet më të dobëta në bazë të procedurës së shortit. Në këtë vazo bie edhe Italia, pasi kualifikimi i saj kalon nëpërmjet play-off-it.
Ndarja e vazove për Botërorin 2026:
Vazo 1: Kanada, Meksikë, SHBA, Spanjë, Argjentinë, Francë, Angli, Brazil, Portugali, Holandë, Belgjikë, Gjermani.
Vazo 2: Kroaci, Marok, Kolumbi, Uruguai, Zvicër, Japoni, Senegal, Iran, Koreja e Jugut, Ekuador, Austri, Australi.
Vazo 3: Norvegji, Panama, Egjipt, Algjeri, Skoci, Paraguai, Tunizi, Bregu i Fildishtë, Uzbekistan, Katar, Arabi Saudite, Afrika e Jugut.
Vazo 4: Jordani, Kepi i Gjelbër, Gana, Kuraçao, Haiti, Zelanda e Re, Fituesi i play off-it europian A, B, C dhe D, Fituesi i play off-it ndërkontinental 1 dhe 2.
Shorti pritet me interes të madh, sidomos nga kombëtaret që synojnë të sigurojnë një vend përmes play-off-it.
