Në Washington u hodh zyrtarisht shorti i Kampionatit Botëror të Futbollit, duke përcaktuar grupet për fazën finale të turneut. Edhe pse Shqipëria dhe Kosova nuk janë ende të kualifikuara, shorti ka vendosur tashmë grupet ku ato do të pozicionohen në rast se sigurojnë biletën drejt Botërorit.
Shqipëria, nëse arrin kualifikimin përmes “Europë Play-off B”, do të bëjë pjesë në Grupin F, së bashku me Holandën, Japoninë dhe Tunizinë. Holanda përbën kundërshtarin më të fortë të grupit, ndërsa Japonia dhe Tunizia mbeten skuadra me eksperiencë ndërkombëtare dhe nivel të lartë konkurrues.
Në anën tjetër, Kosova, nëse arrin të kualifikohet nga “Europë Play-off C”, do të pozicionohet në Grupin D, ku i presin përballje shumë të vështira kundër SHBA-së, Australisë dhe Paraguait.
Shorti prodhoi disa grupe tepër interesante, me përballje midis superfuqive të futbollit dhe skuadrave në rritje, duke premtuar një Botëror të fortë dhe spektakolar.
Grupet zyrtare të Botërorit
Grupi A: Meksikë, Koreja e Jugut, Afrika e Jugut, Europë Play-off D (Danimarka / Maqedonia e Veriut / Çekia / Irlanda)
Grupi B: Kanada, Zvicër, Katar, Europë Play-off A (Italia / Irlanda e Veriut / Uellsi / Bosnja)
Grupi C: Brazil, Marok, Skoci, Haiti
Grupi D: SHBA, Australi, Paraguai, Europë Play-off C (Turqia / Rumania / Sllovakia / Kosova)
Grupi E: Gjermani, Ekuador, Bregu i Fildishtë, Kurasao
Grupi F: Holandë, Japoni, Tunizi, Europë Play-off B (Ukraina / Suedia / Polonia / Shqipëria)
Grupi G: Belgjikë, Iran, Egjipt, Zelanda e Re
Grupi H: Spanjë, Uruguai, Arabia Saudite, Kepi i Gjelbër
Grupi I: Francë, Senegal, Norvegji, Play-off Interkontinental B (Bolivia / Surinami / Irak)
Grupi J: Argjentinë, Austri, Algjeri, Jordani
Grupi K: Portugali, Kolumbi, Uzbekistan, Play-off Interkontinental A (Kaledonia e Re / Xhamajka / R.D. Kongo)
Grupi L: Angli, Kroaci, Panama, Gana
Ky short pritet të ndezë edhe më shumë ethet e kualifikueseve, veçanërisht për Shqipërinë dhe Kosovën, të cilat synojnë të shkruajnë histori me pjesëmarrjen e tyre në Botëror.
