Cristiano Ronaldo, ylli portugez i futbollit, pësoi një tjetër zhgënjim në karrierën e tij duke humbur finalen e Superkupës së Arabisë Saudite. Ekipi i tij, Al Nasr, u mund nga Al Ahli pas gjuajtjeve të penalltive.
Gjatë ndeshjes, Ronaldo shënoi nga penalltia në minutën e 41’, duke i dhënë avantazhin 1-0 Al Nasrit, por Frank Kesi barazoi rezultatin në fund të pjesës së parë. Më vonë, Brozoviç i dha sërish epërsinë Al Nasrit në minutën e 82’, por Al Ahli nuk u dorëzua dhe barazoi sërish në minutën e parafundit me golin e shënuar nga Ibanjez, duke çuar sfidën në gjuajtje penalltish.
Gjatë penalltive, Ronaldo nuk gaboi, por shoku i tij i ekipit, Al Haibari, humbi gjuajtjen vendimtare, duke i dhënë fitoren Al Ahli. Me këtë fitore, Al Ahli shton në koleksionin e tij Superkupën e Arabisë Saudite, pas triumfit historik në Championsin e Azisë këtë vit.
Për Cristiano Ronaldon, kjo është hera e parë në një karrierë të pasur me 36 tituj të fituar në Portugali, Angli, Spanjë dhe Itali, si dhe me kombëtaren e Portugalisë, që nuk arrin të fitojë një trofe zyrtar që nga transferimi i tij në Arabinë Saudite në janar të vitit 2023. Për momentin, legjenda portugeze mbetet futbollisti më i paguar në botë dhe një ndër yjet më të njohur globalisht, por trofetë duket se e kanë shmangur në këtë periudhë të karrierës së tij.
