Tirana do të jetë nën masa të shtuara sigurie të dielën, për shkak të ndeshjes ndërkombëtare Shqipëri–Angli, e cila zhvillohet më 16 nëntor në orën 18:00 në stadiumin “Air Albania”. Policia e Shtetit ka publikuar një plan të detajuar masash, duke paralajmëruar bllokime rrugësh, kontrolle të imtësishme dhe angazhimin e qindra efektivëve për garantimin e rendit dhe sigurisë.
Masat e sigurisë dhe menaxhimi i trafikut
Prej orës 14:00 të datës 16 nëntor, disa akse kryesore pranë stadiumit do të jenë të bllokuara për qarkullimin e mjeteve. Ndër rrugët e mbyllura janë:
“Papa Gjon Pali II”
“Dervish Hima”, pranë ambasadës së SHBA-së
“Asim Zeneli”
“Themistokli Gërmenji”
“Ismail Qemali”
“Mustafa Matohiti”
“Jul Variboba”
“Lekë Dukagjini”
“Avdyl Frashëri”
“Skerdilajd Llagami”
“Faik Konica”
Kontrolle të rrepta për tifozët
Para hyrjes në stadium, tifozët do t’i nënshtrohen kontrolleve të imtësishme. Do të ndalohen: sendet e forta dhe të rrezikshme, lëndët piroteknike, fishekzjarrët dhe flakadanët, objektet metalike, çadrat, çakmakët, banderolat me përmbajtje raciste, karikuesit e celularëve dhe materiale të tjera të ndaluara.
Hyrja për tifozët me bileta do të hapet në orën 15:00. Policia u bën thirrje sportdashësve të paraqiten herët, për të shmangur humbjen e mundësisë për të hyrë për shkak të fluksit të madh.
Masat për sigurinë e ekipit anglez
Policia ka planifikuar shoqërimin dhe sigurimin e ekipit të Anglisë nga mbërritja në aeroportin e Rinasit, drejt hotelit, në stadium dhe deri në nisjen e tyre. Po ashtu, strukturat e sigurisë shqiptare janë në bashkëpunim të plotë me FSHF-në, UEFA-n, Gardën e Republikës, Policinë Bashkiake, zjarrfikësit, shërbimet mjekësore dhe personelin privat të sigurisë.
