Frika nga një epidemi e tuberkulozit ka tronditur pragun e ndeshjes së katërt të fazës së grupeve të Ligës së Kampioneve mes Barcelonës dhe Brugge. Nuk ka asnjë rast të konfirmuar apo të dyshuar mes katalanasve, as brenda stafit: asnjë nga blaugranat (qoftë futbollist apo anëtar i klubit) nuk ka shfaqur simptoma. Por alarmi u ndez pas një rasti të zbuluar mes punëtorëve në kantierin e rikonstruksionit të stadiumit “Camp Nou”. Dhe aq mjaftoi që të vihej në lëvizje protokolli i parashikuar për raste të tilla. Situata është edhe më shqetësuese pasi ndodhi vetëm pak ditë para se klubi të organizojë një seancë stërvitore inaugurale: një lloj prove gjenerale në prag të rikthimit në stadium, kapaciteti i të cilit është rritur në 105.000 vende. Seanca do të përdoret gjithashtu për një test teknik dhe operacional, për t’u siguruar që impianti është më në fund gati për t’u hapur për publikun.
Rreziku i infektimit me tuberkuloz pas skandalit të punëtorëve të padeklaruar
Punimet kanë rënë sërish në qendër të vëmendjes pas skandalit të punëtorëve të padeklaruar dhe të detyruar të punonin në kushte çnjerëzore, por këtë herë për shkak të një hetimi të kryer nga Agjencia e Shëndetit Publik të Barcelonës: një anëtari të ekipit teknik i është diagnostikuar sëmundja infektive dhe ka nisur gjurmimi i kontakteve të tij të ngushta. Kolla e vazhdueshme, temperatura dhe ndjenja e lodhjes janë shenja që përputhen me virusin dhe janë konfirmuar nga analizat diagnostike. Nga 23 personat e kontaktuar, tre janë ende në pritje të rezultateve për të verifikuar nëse janë apo jo të infektuar. Nëse numri i të prekurve do të rritet (mjaftojnë edhe vetëm dy raste), do të zbatohen menjëherë masat për ta kufizuar vatrën dhe për të marrë të gjitha masat e nevojshme.
Çfarë është tuberkulozi dhe si trajtohet
Tuberkulozi është një infeksion bakterial që prek mushkëritë, por mund të përhapet edhe në pjesë të tjera të trupit, përfshirë gjëndrat, kockat dhe sistemin nervor. Ai transmetohet nëpërmjet rrugëve të frymëmarrjes: virusi kalon kur një person i infektuar kollitet ose teshtin. Trajtimi konsiston në një terapi antibiotike të vazhdueshme dhe rigoroze që zgjat rreth gjashtë muaj.
Që nga viti 2023, Barcelona është zhvendosur në stadiumin olimpik “Lluís Companys” në Montjuïc, ku deri më tani ka zhvilluar ndeshjet e La Ligës dhe të Kupave (kombëtare dhe evropiane). Punimet për rikualifikimin e “Camp Nou”-t të vjetër kanë kushtuar mbi një miliard euro dhe, të paktën për momentin, nuk ka ende një datë të saktë për rihapjen e impiantit. Megjithatë, ekziston një datë e mundshme: 22 nëntor, kur në kampionat Barcelona do të presë Athletic Bilbao-n./Fanpage
