Sulmuesi i Liverpool-it, Mohamed Salah, ka reaguar ashpër ndaj UEFA-s për mënyrën si ajo publikoi nderimin për Suleiman al-Obeid, i njohur si “Pelé palestinez”, duke mos përmendur shkakun, vendin dhe rrethanat e vdekjes së tij.
Suleiman al-Obeid, ish-futbollist i kombëtares palestineze me 24 ndeshje ndërkombëtare dhe mbi 100 gola në karrierë, u vra gjatë një sulmi të forcave izraelite në Rripin e Gazës, ndërsa po shpërndaheshin ndihma humanitare. Ai ishte 41 vjeç dhe baba i pesë fëmijëve.
Në një postim në rrjetet sociale, Salah pyeti me forcë: “Pse nuk mund të thuhet si vdiq, ku dhe pse?”, duke theksuar rëndësinë e njohjes së së vërtetës për këtë ngjarje tragjike. Ai ka qenë prej kohësh aktiv në apelimet për ndërprerjen e dhunës dhe masakrave në konfliktin mes Izraelit dhe Hamasit, duke kërkuar ndihma humanitare për Gazën.
Sipas Federatës Palestinase të Futbollit, që nga fillimi i konfliktit në tetor 2023 janë vrarë 321 futbollistë palestinezë. Ndërkohë, klubi Liverpool nuk pritet të marrë masa ndaj Salah për deklaratat e tij dhe ai pritet të luajë në ndeshjen e Community Shield këtë të diel kundër Crystal Palace.
