Fansat e futbollit në mbarë botën kanë rikthyer në vëmendje të ashtuquajturin “mallkim i Aaron Ramsey”, pas lajmit për vdekjen e stilistit të njohur italian Giorgio Armani, vetëm disa ditë pasi futbollisti uellsian shënoi një gol në Meksikë.
Ish-mesfushori 34-vjeçar i Arsenalit dhe Juventusit, i njohur sot si lojtar i ekipit Pumas në Liga MX, shënoi në minutat e fundit të një ndeshjeje kundër Atlas, duke shkaktuar festë në Mexico City. Vetëm pak ditë më vonë, mediat raportuan për vdekjen e Giorgio Armanit.
Ky rast ka bërë që tifozët të rikthejnë në qarkullim “teorinë e mallkimit”, sipas së cilës sa herë që Aaron Ramsey shënon një gol, pak ditë më pas një personazh i njohur botëror humb jetën.
Një përdorues në rrjetin social X shkroi:
“Udhëtim të mbarë Giorgio Armani. Ti ishe viktimë e mallkimit të Aaron Ramsey në vitin 2025.”
Një tjetër komentoi: “A e mbani mend mallkimin e Aaron Ramsey? Ja ku është përsëri. Uellsiani shënoi për Pumas më 31 gusht, goli i tij i parë i vitit, dhe sot stilisti legjendar Giorgio Armani ndërroi jetë.” Disa të tjerë shfaqën skepticizëm, duke thënë se lidhja mes golave të Ramsey-t dhe vdekjeve të personazheve të famshëm është thjesht një rastësi e çuditshme, por për tifozët supersticiozë kjo dukuri është bërë tashmë pjesë e “mitologjisë së futbollit”.
Raste të mëparshme të lidhura me “mallkimin”
Ky nuk është hera e parë që tifozët bëjnë lidhjen mes një goli të Ramsey dhe vdekjes së një figure të njohur. Në të kaluarën janë regjistruar dhjetëra raste, të cilat kanë ushqyer mitin:
Osama bin Laden – u vra më 2 maj 2011, një ditë pas golit të Ramsey kundër Manchester United.
Steve Jobs – vdiq më 5 tetor 2011, tre ditë pas golit të Ramsey kundër Tottenhamit.
Muammar Gaddafi – u vra më 20 tetor 2011, një ditë pas shënimit kundër Marsejës.
Whitney Houston – ndërroi jetë më 11 shkurt 2012, një ditë pas golit të tij kundër Sunderland.
Paul Walker – humbi jetën më 30 nëntor 2013, ditën kur Ramsey shënoi dy herë për Arsenalin kundër Cardiffit.
Robin Williams – vdiq më 11 gusht 2014, një ditë pas golit të Ramsey në Community Shield.
David Bowie – ndërroi jetë më 10 janar 2016, një ditë pas golit kundër Sunderland.
Alan Rickman – aktori i famshëm vdiq më 14 janar 2016, një ditë pas golit të Ramsey kundër Liverpoolit.
Keith Flint (The Prodigy) dhe Luke Perry – vdiqën më 4 mars 2019, dy ditë pas golit të Ramsey kundër Tottenhamit.
Papa Françesku – u raportua i ndjerë më 21 prill 2025, vetëm dy ditë pasi Ramsey u emërua trajner i Cardiff-it. Lista e gjatë e emrave përfshin gjithashtu figura si Eric Bristow, Stephen Hawking, Olivia Newton-John, Nicky Hayden, Roger Moore, Nancy Reagan dhe shumë të tjerë.
Në vitin 2015, vetë Aaron Ramsey i hodhi poshtë këto pretendime duke i cilësuar “qesharake”. Megjithatë, me humor ai kishte pranuar se “në disa raste mund të ketë pastruar disa të këqij”, duke e mbajtur gjallë diskutimin mes fansave.
