Në ceremoninë që organizoi Federata Shqiptare e Futbollit për mbylljen e vitit, nuk u humb rasti të krijohej sërish përçarje e panevojshme dhe tension në radhët e kombëtares. Bëhet fjalë për ndarjen e çmimeve, ato që teorikisht duhej të zgjidheshin me votë, por që në fund, prej një gabimi njerëzor, çuan në skualifikimin faktik të një futbollisti të kombëtares.
VNA ka mësuar se në votimin e bërë për “Lojtarin e vitit të kombëtares shqiptare”, të cilin zyrtarisht e fitoi kapiteni Berat Gjimshiti, rezultati final i kryesuesve kishte qenë i barabartë: 8 vota Berat Gjimshiti dhe 8 vota Myrto Uzuni. Mirëpo, në korridore thuhet se ka pasur një sugjerim “të brendshëm” që fituesi, për të dytin vit radhazi, të ishte Gjimshiti.
Kjo ka zemëruar pa masë Uzunin, i cili gjithsesi është treguar i rezervuar dhe nuk ka dashur të flasë në publik. Ai është ankuar brenda radhëve të kombëtares dhe, nga frika se mos kjo zbulohej, organizatorët i kanë kërkuar falje.
A e meriton Gjimshiti të shpallet lojtar i vitit? Pa diskutim që po. Mirëpo problemi është tek padrejtësia e përcaktimit të një fituesi pa short dhe pa rivotim, kur votat janë njësoj. Problem është edhe fakti që FSHF organizon votime të tilla ku votojnë vetë futbollistët kuqezi për të zgjedhur shokun e tyre si lojtar të vitit, duke krijuar tension krejtësisht të panevojshëm përpara ndeshjeve vendimtare të “play off”-it të Botërorit.
Dhe më keq akoma, ky tension cilësohet si një ndarje mes kuqezinjve nga Shqipëria dhe atyre nga trojet e Kosovës. Kjo është shumë e rrezikshme në një grup që, gjithsesi, disa ndasi i ka tashmë.
