Fitorja e Shqipërisë ndaj Andorës mbrëmjen e djeshme, e cila siguroi Play-Off-in për kualifikueset e Botërorit 2026, nuk ishte e njëjtë për sulmuesin Armando Broja. Në fund të ndeshjes, Broja qëndroi i ulur në pankinë dhe nuk iu bashkua festës së bashkëlojtarëve dhe tifozëve në stadium. Vetëm pas insistimit të mbrojtësit Elsaid Hysaj, ai iu bashkua grupit.
Arsyeja e pakënaqësisë duket të ketë qenë zëvendësimi i tij në fillim të pjesës së dytë, kur trajneri Sylvinho e nxori nga loja për të futur Uzunin. Lëvizja rezultoi e suksesshme, pasi Uzuni asistoi për golin e vetëm të avantazhit të shënuar nga Asllani.
Broja nuk është në formën më të mirë kohët e fundit dhe ka pasur paraqitje të dobëta në disa ndeshje. Prandaj, më e drejtë është që sulmuesi të përqendrohet te rezultati i ekipit dhe përmirësimi i performancës së tij, duke vendosur egon personale në plan të dytë.
