Në Përmet po vazhdon ndërtimi i një qendre të re informacioni pranë monumentit natyror të “Gurit të Qytetit”, një prej simboleve më të njohura të qytetit. Projekti është iniciuar nga ish-ministrja e Kulturës dhe deputetja e zonës, Mirela Kumbaro, por ka shkaktuar reagime të forta në komunitet.
Sipas kritikëve, ndërtimi po kryhet brenda zonës së mbrojtur të monumentit natyror, duke shkelur ligjin për mbrojtjen e trashëgimisë natyrore. Përmetarët e kanë kundërshtuar hapur këtë projekt, duke e cilësuar të panevojshëm dhe të dëmshëm për peizazhin dhe identitetin natyror të zonës. Ata theksojnë se në qendër të qytetit ekziston tashmë një qendër funksionale informacioni për turizmin, si edhe disa pika të tjera në zonat përreth, çka e bën këtë investim të tepërt.
Ndërkohë, punimet kanë vijuar pavarësisht kundërshtimeve, ndërsa autoritetet nuk kanë dhënë ende një qëndrim të qartë për ligjshmërinë dhe ndikimin e këtij ndërtimi në monumentin natyror të mbrojtur të Përmetit.
