Një zjarr me pasoja fatale është shënuar në lagjen nr. 13 të qytetit të Korçës ku si pasojë e tymit ka ndërruar jetë një 70-vjeçare brenda banesës së saj.
Viktima është identifikuar si Fluturie Potka. Burime bëjnë me dije se e moshuara ishte e paralizuar dhe jetonte e vetme, çka e ka bërë të pamundur reagimin në kohë për t’u shpëtuar flakëve.
Sipas informacioneve paraprake, dyshohet se zjarri ka rënë si pasojë e jorganit me korrent që përdorte e moshuara për t’u ngrohur. Mësohet se 70-vjeçarja ka pësuar edhe djegie në trup, ndërsa shkaku kryesor i vdekjes dyshohet të jetë asfiksia nga tymi.
Në vendngjarje kanë mbërritur shërbimet zjarrfikëse dhe policia, të cilat kanë shuar flakët dhe po punojnë për zbardhjen e plotë të rrethanave të ngjarjes.
