Vatra e zjarrit në zonën e Syrit të Kaltër vijon të jetë aktive që prej ditës së djeshme, duke përbërë një rrezik serioz për natyrën, banorët dhe turistët. Që prej orëve të para të mëngjesit të sotëm, për shuarjen e flakëve janë angazhuar një avion i tipit Canadair dhe një helikopter, në përpjekje për të frenuar përhapjen e mëtejshme të zjarrit.
Një ditë më parë, rreth 500 turistë u evakuuan nga zona për shkak të rrezikut të madh që paraqet zjarri, ndërsa aksi rrugor Muzinë–Sarandë u mbyll pasi flakët zbritën deri pranë rrugës, duke e bërë të pamundur qarkullimin e automjeteve.
Situata paraqitet alarmante edhe në Finiq, ku zjarri ka përfshirë disa fshatra dhe ka shkaktuar dëme materiale, përfshirë djegien e disa banesave. Në zonën e Lekëlit, në Tepelenë, flakët janë përhapur me shpejtësi të madhe për shkak të erës së fortë, duke vështirësuar ndërhyrjen e zjarrfikësve.
Autoritetet janë në gatishmëri të plotë, ndërsa u bëjnë thirrje banorëve dhe vizitorëve të shmangin zonat e rrezikuara dhe të ndjekin udhëzimet e emergjencës civile.
