Autostrada Tiranë–Durrës do të vijojë të përballet me kufizime në qarkullim si pasojë e punimeve për rehabilitimin e shtresave asfaltike në segmentin Vorë – Ura e Dajlanit. Autoriteti Rrugor Shqiptar (ARRSH), në bashkëpunim me Policinë e Shtetit, ka hartuar një plan të ri menaxhimi të trafikut, për të shmangur sa më shumë kaosin rrugor.
Sipas njoftimit zyrtar, duke filluar nga sot, 14 tetor, në orarin 23:00 – 06:00, do të ketë bllokim të përkohshëm të qarkullimit në drejtimin Vorë–Durrës, në këto segmente kryesore:
Vorë – Maminas
Maminas – Sukth
Sukth – Fllakë
Fllakë – Mbikalimi i Shkozeti
Mbikalimi i Shkozetit – Ura e Dajlanit
Punimet në secilin segment pritet të zgjasin 1 deri në 2 ditë, ndërsa pritet që ndërhyrjet të përfundojnë brenda kësaj jave.
Për të shmangur trafikun dhe vonesat, ARRSH sugjeron përdorimin e rrugës alternative: Vorë – Maminas – Katër Rrugët e Shijakut – Durrës, gjatë orareve të bllokimit.
Pas përfundimit të ndërhyrjes në drejtimin Vorë–Durrës, punimet do të zhvendosen në kahun tjetër të autostradës, Ura e Dajlanit – Vorë, sipas të njëjtit plan dhe orar.
ARRSH thekson se ndërhyrja është e domosdoshme për përmirësimin e cilësisë së rrugës dhe u bën thirrje qytetarëve për mirëkuptim dhe përdorimin e rrugëve alternative për të lehtësuar qarkullimin dhe vijimin e punimeve pa ndërprerje.
