Shqipëria po përballet me një situatë të rënduar zjarresh në disa zona të vendit, ku vijojnë të jenë aktive 10 nga 13 vatra zjarri të raportuara deri në mesditën e sotme. Terreni i vështirë, temperaturat e larta dhe era po pengojnë operacionet e shuarjes, ndërsa në disa raste është dashur edhe ndërhyrja ajrore.
Situata në qarqet kryesore:
Bulqizë – Dy vatra zjarri janë raportuar në këtë bashki. Në fshatin Tërnovë, njësia Zerqan, zjarri vazhdon të përparojë në kurorën pyjore, me rrezikshmëri të lartë për përhapje. Janë angazhuar mbi 50 forca nga strukturat shtetërore dhe Forcat e Armatosura, si dhe një helikopter i Forcës Ajrore. Ndërkohë, vatra në Malin me Gropa, afër fshatit Val, mbetet nën monitorim për shkak të terrenit të rrezikshëm.
Fushë Arrëz – Në fshatin Xeth, njësia Blerim, vijon përpjekja për shuarjen e tre vatrave të ndara. Janë përfshirë mbi 150 forca nga disa institucione dhe ka ndërhyrë edhe një helikopter. Zjarri ka hyrë në zona me pisha të dendura.
Mirditë – Në Rubik, fshati Velë, zjarri ka përfshirë një masiv pyjor me pisha. Terreni i thepisur po vështirëson ndërhyrjen tokësore. Pjesë e operacionit janë 48 forca nga MZSH, bashkia dhe struktura të tjera.
Tiranë – Vatra të shumta janë regjistruar në fshatrat Ibë, Durisht, Damjan, Ferraj, Zall-Herr, Priskë e Vogël, Zgure dhe Pezë-Helmës. Në këtë të fundit, situata është më e rënduar për shkak të rrezikut që paraqet për pyllin me pisha të Pezës. Janë angazhuar dhjetëra forca zjarrfikëse dhe ka operuar edhe një helikopter i EBA.
Kolonjë – Në Parkun Natyror të Gërmenjit, vatra është nën monitorim pas neutralizimit të saj, megjithatë kushtet atmosferike kanë sjellë riaktivizime të vogla.
Gramsh – Në njësinë Skënderbegas dhe Kukur janë riaktivizuar disa vatra, ku zjarrfikësit, punonjësit e pyjores dhe vullnetarët vijojnë punën për shuarjen e tyre.
Elbasan – Në Malin e Shirokës, njësia Zavalinë, zjarri mbetet aktiv, ndërsa terreni dhe dendësia e pyllit po e bëjnë ndërhyrjen të vështirë.
