Një moment historik u shënua sot në zemër të Bavarisë, gjatë festës më të madhe popullore në botë, Oktoberfest, e cila zhvillohet që prej vitit 1810. Për herë të parë në historinë e saj, veshjet dhe kultura tradicionale shqiptare u prezantuan në paradën madhështore të Trachten- und Schützenzug, një nga aktivitetet më të rëndësishme të festivalit.
Rreth 9,000 pjesëmarrës nga shoqatat e kostumeve tradicionale të Bavarisë dhe të gjithë Evropës morën pjesë në këtë paradë unike, e cila përfshin mbi 60 grupe me kostume historike dhe folklorike. Në mesin e tyre, Shqipëria dhe Kosova u bënë pjesë për herë të parë, duke sjellë ngjyrat, trashëgiminë dhe simbolikën e pasur të veshjeve shqiptare.
Kjo arritje e veçantë u bë e mundur falë përkushtimit të Shoqatës “Iliria München”, e cila prej 25 vitesh ka kontribuar në ruajtjen dhe promovimin e kulturës shqiptare në Bavari. Me mbështetjen e Ministrisë për Evropën dhe Punët e Jashtme të Republikës së Shqipërisë, një grup përfaqësues prej 40 anëtarësh parakaloi krenar me veshje tradicionale nga të gjitha trevat shqiptare, të udhëhequr nga Xhubleta – veshja e grave shqiptare, e cila përfaqëson një trashëgimi 4000-vjeçare dhe është njohur nga UNESCO si simbol i reziliencës dhe identitetit shqiptar ndër shekuj.
Në këtë parakalim madhështor, flamurin e Shqipërisë e mbajti Konsullja e Përgjithshme e Republikës së Shqipërisë në Mynih, e veshur me kostumin tradicional të grave të Jugut, ndërsa flamurin e Kosovës e mbajti Konsulli i Përgjithshëm i Republikës së Kosovës.
Parada, e cila përshkoi 7 kilometra në rrugët kryesore të Mynihut, u ndoq nga rreth 6 milionë vizitorë nga e gjithë bota dhe u transmetua drejtpërdrejt në mediat televizive, duke i dhënë një jehonë të madhe kulturës shqiptare në arenën ndërkombëtare. Ky prezantim përfaqëson jo vetëm një arritje të diasporës shqiptare në Gjermani, por edhe një dëshmi të qartë të vlerësimit dhe respektit për trashëgiminë tonë kombëtare.
Falënderime të përzemërta i shkojnë Shoqatës “Iliria München” dhe të gjithë të rinjve e të rejave pjesëmarrës, të cilët me krenari dhe dinjitet mbajtën veshjet tona tradicionale, duke e ngritur lart kulturën shqiptare në këtë ngjarje botërore.
