Banorët e fshatit Baks-Rrjoll, në Velipojë, kanë protestuar sërish sot kundër ndërtimit të një resorti luksoz në zonën e tyre.
Protestuesit kanë bllokuar punimet këtë të premte, duke ndërhyrë drejtpërdrejt në kantier dhe nxjerrë punonjësit nga makineritë e rënda. Situata ka sjellë edhe përplasje me forcat e policisë, ndërsa punimet janë ndërprerë dhe punonjësit kanë zbritur nga fadromat.
Banorët kanë bërë thirrje për bashkëpunim edhe me banorët e tjerë të zonës, duke u shprehur të vendosur për të bllokuar çdo ditë punimet deri në plotësimin e kërkesave të tyre.
Kjo është dita e pestë e protestës së banorëve të Baks-Rrjoll, pas një aksioni të një dite më parë pranë SPAK, ku kërkuan ndërhyrjen e institucioneve. Banorët kanë paralajmëruar një tjetër protestë të hënën në orën 09:00 pranë Prokurorisë së Shkodrës.
