Kultivuesit e ullinjve në fshatrat e Mallakastër kanë ngritur shqetësimin për mungesën e tregut të shitjes së vajit të ullirit, duke deklaruar se sasi të mëdha të prodhimit kanë mbetur stok. Edhe pse ullinjtë e zonës njihen për traditën shekullore dhe cilësinë e lartë të vajit, fermerët thonë se vështirësitë në tregtim po i përballin me probleme serioze ekonomike.
Sipas tyre, prodhimi këtë vit ka qenë i bollshëm, çka ka shtuar nevojën për krijimin e pikave të grumbullimit në zonë. Kultivuesit kërkojnë ndërhyrjen e shtetit për krijimin e një marke identifikuese që do të ndihmonte në promovimin dhe eksportimin e ullinjve dhe vajit të ullirit të prodhuar në Mallakastër.
Fermerët theksojnë se kostot e kultivimit dhe përpunimit janë tepër të larta, duke nisur nga mirëmbajtja e ullishteve deri te përpunimi në fabrikë. Për shkak të mungesës së tregut, ata shprehen se shpesh janë detyruar ta shesin prodhimin nën kosto, ndërsa paralajmërojnë se, nëse situata vijon kështu, shumë prej tyre do të heqin dorë nga kultivimi i ullinjve për shkak të humbjeve të vazhdueshme.
