Në një fluturim të Ryanair drejt Ishujve Balearik janë regjistruar momente paniku, pasi aeroplani u përfshi nga një turbulencë e fortë që plagosi dy anëtarë të ekuipazhit. Avioni, me rreth 180 pasagjerë në bord, ishte nisur nga Vitoria (Spanjë) për në Palma de Majorka. Gjatë afrimit për ulje në aeroportin Son Sant Joan, kushtet e këqija të motit me stuhi dhe reshje të dendura shiu shkaktuan lëkundje të forta të mjetit fluturues.
Në atë moment, stjuardët po bënin kontrollet e zakonshme të sigurisë. Njëri prej tyre u ngrit nga toka dhe u përplas në tavanin e kabinës, ndërsa një tjetër u rrëzua pasi u godit nga karroca e kateringut.
Në pistë prisnin ambulancat, të cilat ndërhynë menjëherë. Pasagjerët u evakuuan pas disa minutash, ndërsa dy të plagosurit mbetën me dëmtime të konsiderueshme, të përshkruara si “të rënda”.
Nuk është hera e parë që Ryanair përballet me incidente të ngjashme. Në qershor, një fluturim Berlin–Milano u detyrua të ulej emergjentisht në Gjermani, ku u plagosën nëntë persona, mes tyre edhe një fëmijë.
Agjencia Evropiane për Sigurinë e Aviacionit ka nisur hetimet për ngjarjen, ndërsa kompania Ryanair ka shprehur keqardhjen dhe ka deklaruar se po bashkëpunon plotësisht me autoritetet.
